Thursday 25 December 2014

ಅದಿತಿಪೊಯಮ್ಸ್


ಕುಣಿಕುಣಿಯುತ ನೆಗೆನೆಗೆಯುತಾ
ಬಂದಿತೆಮ್ಮ ಕೂಸು
ಕಲಕಲರವ ಖುಷಿಯ ಹರಿಸೊ
ಮನೆಯ ಮಂದಹಾಸ
ಫ್ರಿಲ್ಲು ಫ್ರಾಕು ಒದೆಯುತಾ
ಚಿಗುರೆ ಬಂತು ಒಳಗೆ
ಗಲಗಲಿಸುವ ಮೊಗದ ತುಂಬಾ
ನಲಿವ ನಗೆಯ ಬುಗ್ಗೆ
ಕಥೆಯ ಸರಣಿ ಹರಿದು ಬಂತು
ನೀಳ ರೈಲಿನಂತೆ
ರೈಲು ಕಂಬಿ ಸೇರದಂತೆ
ಕಥೆಯೂ ಮುಗಿಯದಂತೆ
ಚಟಪಟಪಟ ವಟಗುಡುವಳು
ನಿಂತೂ ನಿಲ್ಲದೆಂದೂ
ಕೊಟ್ಟಿಗೆಯಲಿ ತುಯ್ದಾಡಿದ ಕರು
ಗೆಳತಿ ಬಂದಳೆಂದು
ತುಂಬು ರಾತ್ರಿ ಚಂದ್ರನೊಡನೆ
ಪಂದ್ಯ ಕಟ್ಟೊ ತುಂಟಿ
ಪ್ರೇಮ ಮೂರ್ತಿ ಸೋಮ ಕೂಡಾ
ಸೋತ ಮಾತಿಗಂಟಿ
ಬದುಕು ಕೊಟ್ಟ ಪುಣ್ಯ ನೀನು
ಮಧುವ ಸುರಿಸೊ ರಾಣಿಜೇನು
ವರವೇ ನಿಜ ಅರಿವೆಯೇನು?
ಮನೆ ಮನಗಳ ಕಾಮಧೇನು
ಸುಖದ ಶೃಂಗ ಒಲವ ಭೃಂಗ
ಇದು ವಾತ್ಸಲ್ಯದ ಉತ್ತುಂಗ
ಮನಮೋಹಕ ಮುದ್ದುಬಾಲೆ
ನಡೆವ ಮಧುರ ಮೃದಂಗ
-ವಿಶ್ವಾಸ್ ಭಾರದ್ವಾಜ್

No comments:

Post a Comment